Z Běłeje Góry/Byhleguhre. Ten pětk a sobotu buźo tudy zapust. Ceła wjas se na njen pśigótujo. K tomu słuša organizěrowanje camprowanja, dwójeje reje a pśeśěga. Ale lětosa su žeńske sebje něco nowego prědk wezeli. Rozmjej, wóni su kśěli wěcej wót swěźeńskeje drastwy zgóniś.
Heinzojc šlodaŕnja ze Žylowa jo pśewjadła we starem konsumje tśi kurse. Pśeto teliko wejsanaŕkow jo se za to pśipowěźeło, až z jadnogo planowanego kursa za šesć žeńskich su nastali tśi kurse ze 14 žeńskimi. Šlodaŕka Doris Heinzowa jo jim rozkładowała źěle drastwy. K eksemplu to, až regularna kóšula k rejowanju ma cerwjenu barwu. Ale teke druge barwy su móžne, jano nic carna a bruna. Kóńc kóšule dej byś z cańkami wupyšnjony, ale jano w namšaŕskej drastwje směju te same carne byś.