Z Chóśebuza/Cottbus. Wósebnu a gnujucu wucbu historije su wukniki wugbaśowego kursa na Dolnoserbskem gymnaziumje měli kóńc januara. Pśi góźbje wótwórjenja wustajeńce „Mójej žydojskej starjejšej, mójej pólskej starjejšej“ w złykomorojskej radnicy jo do Dolnoserbskego gymnaziuma woglědała Joanna Sobolewska-Pyzowa – něgajšna pśedsedaŕka towaristwa „Źiśi holocausta“ a jadna wót 15 paršonow, kótarychž kjabel jo we wustajeńcy pokazany a wopisany – wóni słušaju k 5.000 žydojskim źiśam we okupěrowanej Pólskej, kótarež su schoah (mordowanje Žydow za cas nacionalsocializma) pśežywili, dokulaž pólske familije su je kšajźu ku se wezeli a pśed smjerśu woplěwali.