Z města/Cottbus. Južo dwa raza su gromaźe treněrowali – te serbske balokoparje z Dolneje a Górneje Łužyce: łoni w oktoberje w Njebjelčicach/Nebelschütz w Górnej Łužycy a na zachopjeńku januara w Chóśebuzu, samo tśi dny dłujko. Rowno tak wažne – snaź hyšći wažnjejše – jo pak gromaźe graś we jadnom měšanem mustwje. Ako take ga kśě serbske balokoparje – te z mustwa „Serbske balokoparje/Wendische Auswahl“ a te z mustwa „Serbska wubranka“ – pón w juniju togo lěta zastupowaś Serbow a Domowinu na Europeaźe w Korutańskej w Awstriskej.

Taku dobru góźbu su měli sobotu, 18. januara. Tak ako južo we slědnyma lětoma su byli kazane na turněr wó pokal „Braunkohle-Cup“ we sportowej hali „Łužyca“, ako jo sportowe zjadnośeństwo „Frischauf“ w Brjazynje lětosa južo 12. raz wugótowało. Tśi dny, wót 17. do 19. januara, jo wóno we tej hali pśewjadło dogromady 9 wšakich turněrow ze 52 mustwami źiśi, młoźiny a dorosćonych, a ten wó „brunicowy pokal“ jo był mjazy nimi ten nejwažnjejšy a nejatraktiwnjejšy.