Z Groźišća/Grötsch. Gmejnska rada mósćańskeje gmejny (ku kótarejž Groźišćo słuša) ma wobmyslenja pśeśiwo nowej spalaŕni wótpadankow (Müllverbrennungsanlage), kótaruž co LEAG pódla janšojskeje elektraŕnje twariś. To jo wulicował prědkstojaŕ Groźišća Andre Wjencko (Wenzke) wobydlarjam na woklapnicy pětk tyźeń wjacor we gmejnskej wjažy w Groźišću.

Wina na tom pak njejo tšach pśed gadowatymi spuchami a skazonym luftom. Gmejnska rada wšak wěri, až we nowej spalaŕni, buźo-li se twariś, buźo se nałožyś nejnowša technologija a wšykne wobswětowe normy za cystosć lufta budu dopołnjone. Ně, jim źo wjele wěcej wó wobuzu dla wjelich LKWejow, ako budu wótpadanki do spalaŕnje pśiwózowaś a popjeł wótwózowaś. Pśeto we planach koncerna stoj, až 480.000 tonow wótpadankow dej se tam k lětu spaliś, wót cogož jano 10% buźo pó zeleznicy librowanych, a ta wuškowna licba z LKWejami. Stakim musy se licyś ze 60 awtami ku dnju, narowno kužde 20 minutow by pón jaden śěžki LKW dejał pśijěś a wótjěś. „To naša gmejna njoco!“ jo Andre Wjencko pódšmarnuł.