We jsach su woklapnice, źož pśepowědaju to slědne lěto. Woklapaś comy how, což jo se 2019 tšojło w našej cerkwi. Pór personelnych změnow jo było w cerkwinem wjednistwje. W aprylu jo krajna synoda wuzwóliła Christiana Stäbleina ako nowego biskupa za krajnu cerkwju Barliń-Bramborska-šlazyńska Górna Łužyca. W nowemberje jo stipił do swójogo nowego amtu ako naslědnik biskupa Markusa Drögego.

Chóśebuski cerkwiny wokrejs ma nowego promšta, Georga Thimmego. Wólbna synoda jo se w juniju za njogo rozsuźiła ako naslědnika promštowki Ulriki Menzeloweje, ako jo Serbam bliska była. Promšta Thimmego su w septemberje nutś wjadli do amta. Nowy jo teke faraŕ Matthias Scheufele, wón nawjedujo wót decembra kórjeński „Centrum za dialog a změnu“. Jogo pśedchadnik Burkhard Behr jo ten centrum južo 1. měrca 2019 spušćił.