Zachadny tyźeń pětk su Domowinske cłonki a młoge dalšne wobydlarje w Turjeju na kjarchobje se na pśecej rozžognowali z jadnym Turjanarjom a Serbom, kenž jo wósebnje w lětach do 1990 wjele dobrego naźěłał, wósebnje na Domowinskem, serbskem pólu. Na zakopowanju jo pśedsedaŕ tamneje Domowniskeje kupki Harald Końcak na njogo w serbskej rěcy spominał. Jo to Walter Blinda, ako jo 92 lět stary krotko pśed gódami wumrěł.

Wón jo se naroźił 2. měrca 1927 w serbskej burskej familiji w Janšojcach. Tam jo tek chójźił do šule a musał sobu dolabowaś, kak bu jogo mamina rěc slědk tłocona, wusměšowana a na kóńcu zakazana.