Simone Gutšmidtowa, naroźona Jonatojc, jo se naroźiła na 10.06.1961 w měsće Karl-Marx-Stadt a wumrěła na 8.1.2020 w Chóśebuzu w CTK pó krotkej, śěžkej chórosći.

Prědne lěta jo wórosła w Borstendorfje w Rudnych Górach. Jeje starjejšej stej z njeju 1964 śěgnułej do Wórjejc dla nowego bydlenja a dobrego źěła w brunicy. Nan jo źěłał w elektraŕni w Carnej Plumpje a maś w Hornikecach ako wótkubłaŕka w BKK. Wóna jo chójźiła ako DDR-góle do źiśownje a do PWŠ „Jurij Gagarin“. Simone jo měła dwa hobbija – kreslenje a wugbaśowy sport. A wóna jo była wjeliki talent wobwoda Chóśebuz za chytanje kopja. Jeje trenaŕ jo kśěł, až źo do specialneje šule w Barlinju, aby wordowała wugbaśowa sportaŕka za naš kraj. To njejo klapowało, dokulaž starjejšej njejstej to dowóliłej. Maś jo kśěła, až Simone nawuknjo pówołanje we brunicy. Starjejšej stej ga byłej gjardej górnika. Simone njejo kśěła domownju znicyś, togodla jo kśěła na wucabnicu za dolny schójźeńk w Chóśebuzu studěrowaś.