W gódownem casu a w casu kołowokoło Nowego lěta jo było teke w Dolnej Łužycy śicho na sportnišćach, źož howacej wjelgin cesto balo kopju, nanejmjenjej kuždu sobotu a njeźelu. Ale w Chóśebuzu njejsu balokoparje se za tym měli. Tśi dny dłujko – wót 3. do 5. januara – su se how zmakali serbske balokoparje z Dolneje a Górneje Łužyce na zgromadne treningowe lěgwo. Notne a wažne take jo, pśeto na Europeaźe 2020, to groni: na europskich mejstaŕstwach narodnych mjeńšynow w balokopanju, buźo serbske mustwo zestajane z wobźělnikow z Dolneje a Górneje Łužyce. Połojca, połojca, tak ako Domowina jo to wustajiła. To samske płaśi teke za žeńskece mustwo. Na doněntejšnych tśich Europeadach 2008 w Šwicaŕskej, 2012 w Łužycy a 2016 w Italskej ga běchu balokopaŕki a balokoparje jano z Górneje Łužyce Serbow zastupowali.