Z Myšyna/Müschen. W Myšynje buźo we nowem lěśe prědny raz we historiji teje jsy zněś zwón. Wót togo jo było grono na tej prědnej lětosnej woklapnicy Dolneje Łužyce, rozmjej, pětk wjacor we gromadnej wjažy w Myšynje.

Myšyn słuša k wjerbańskej wósaźe, we jsy njejo žednje dało cerkwju. Kopicka myšyńskich wósadnikow jo pśišła łoni na tu ideju, až mógli weto – za eksemplom drugich jsow – stajiś we jsy zwónicu (Glockenturm) a powjesyś zwón, ako buźo wejsanarjam zwóniś k wósebnym tšojenjam kaž swajźba abo zakopowanje. Pśi góźbje komunalnego wuzwólowanja jo wejsna rada na póžedanje tych iniciatiwnikow organizěrowała wobydlaŕske zgłosowanje dla teje wěcy. A glej, 194 luźi (wót 293, ak su měli pšawo swój głos wótedaś) jo se wobźěliło, a 60% wót nich su zgłosowali za zwón.