Z Baršća/Forst. Južo pśecej su wužywali za wokrejs SPN to serbske mě „Sprjewja-Nysa“. Na Wokrejsnem domje w Baršću jo to we dwěma rěcoma wjelike napisane. Wótněnta pak jo take nimsko-serbske pomjenjenje ceło oficielne, tak ako južo w měsće Chóśebuz. To groni, až ma se to mě „Landkreis Spree-Neiße / Wokrejs Sprjewja-Nysa“ wšuźi tam, źož wokrejs, jogo zastojnstwo a jogo wokrejsny sejm wustupiju w zjawnosći a oficielnje, wužywaś – mjazy drugim w listach a dalšnych dokumentach.

To jo pśed tyma tyźenjoma wobzamknuł wokrejsny sejm na swójom lětosnem slědnem pósejźenju we Wokrejsnem domje. Wjelika wětšyna tych pśisamem 50 cłonkow w 6 frakcijach jo se za to rozsuźiła. Z tym su se měli pó naraźenju w nowej bramborskej Serbskej kazni, až mógu wokrejse w serbskem sedleńskem rumje pśiwześ take oficielne nimsko-serbske mě.