Z Blunja/Bluno. Kóńc nowembera su starše źiśi z tudskeje źiśownje „Rasselbande“ jěli z busom do susedneje jsy Terpje, do Klamaric pjakaŕnje. Tam su gromaźe z pjakaŕku Marion Klamarjoweju napjakli gódowne placki. Južo jězdźenje z busom jo se jim wjelgin spódobało. Pśeto źiśi worduju w źinsajšnem casu pśisamem jano wózone z awtom. Do wjelikego cerwjenego regio-busa maju jano rědku góźbu stupiś.

Te placki su se rownali małkim gódownym škrjokam. Źiśi su je ze śěsta z formami wuštapowali. Wóni su se źiwowali tomu wjelikemu pjacu, do kótaregož te placki su wordowali suwnjone. A naslědku su źiśi je pyšnili, až pótom su wóni wuglědali napšawdu kaž škrjocki. Źiśi su je wzeli sobu domoj.