Z Chóśebuza/Cottbus. Wót 3. do 5. decembra jo w Měsćańskem muzeumje zasej zwónašk zaklincał, ako jo małym gósćam – tym Witaj-wuknikam a serbšćinarjam tśeśego lětnika ze 13 łužyskich zakładnych šulow – pśichad zajmneje pótajmneje póstawy pśipowěźeł. Janšojski bog, rědnje woblacony a wupyšnjony wót Spěchowańskego towaristwa Serbskego muzeja, jo pśišeł jim wobraźowat a je žognowat, aby w nowem lěśe wjele gluki měli. Za to su źiśi se jomu źěkowali ze serbskimi gódownymi spiwami a gronkami.
Jo był južo 22. raz, až su Serbski muzej, jogo spěchowańske towaristwo a Rěcny centrum Witaj w adwentskem casu na muzeumowe dny pšosyli, aby serbskim wuknikam ako gódowny projekt awtentiske dožywjenje nałoga z Janšojskim bogom zmóžnili a tek pódla togo dalšny program bitowali.