Serbska pratyja 2020, Ludowe nakładnistwo Domowina, 8 euro

Christiana Piniekowa naraźijo:

Wjelgin informatiwna a wjelebocna publikacija w serbskej rěcy jo Serbska pratyja. Prědna jo wujšła 1880. W nejnowšem wudaśu bóžko njejsom namakała mały pratyjowy jubilej naspomnjony. Wót wšogo zachopjeńka jo zapołožona ako knigłowa pratyja. Hynac ako w pjerwjejšych casach wšake pratyje (historiskich datow, stolětna wjedrowa abo z ewangelskimi mjenjami) wucyniju jan mały źěl knigłow, w kótarychž su kulturne bogatstwa w śišćanej formje nazběrane.

W centrumje stoj tenraz Žylow. My Serby wiźimy jen zwětšego ako wjas, rownož jo lěta juž amtski źěl města. Wjele nowego ale teke wózabytego se pśedstaja, tež w dwěma staroznatyma rubrikoma – w Pratyji za kśesćijanow a Pratyji za źiśi. Historiske tšojenja, portrety luźi, interview, basnje, gronka, wulicowanja, wobraze a fota wabje do listowanja a do cytanja.

Na zachopjeńku mamy krotke pśedstajenje yoga-pozicijow (azana) a pśispomnjeśa k awtoram a awtorkam na kóńcu.