W nazymje 1989 jo w Nimskej demokratiskej republice kněžeca strona SED póněcom swóju móc zgubowała. Jeje kněstwo jo se drobiło. Srědki kněstwa su chopili rozpadowaś – politběrow CK SED, statna bźeztšašnosć (skrotcone stasi), policija, wójsko, blokowe strony CDU, DBD, LDPD, NDPD a masowe organizacije.
Statna bźeztšašnosć jo se 17. nowembra 1989 pśemjenjowała na Amt za narodnu wěstosć. Paralelnje k wopytoju, struktury stasi zdźaržaś, su głownoamtske sobuźěłaśerje zachopinali wótbywaś swóje w 40 lětach nazběrane akty. Z wida wjednistwa amta jo było toś to pśedewześe ambiwalentne: K prědnemu jo sebje zachopjeńk znicenja pominał pśiznaśe pórazki. Jano gaž jo było wótwiźeś, až se pśeśiwna strona zmócni archiwow a aktow, jo znicenje była tema. K drugemu jo w toś tych aktach wjelgin wjele źěła štycało. Jeje wuslědki znicyś by sobuźěłaśerjow stasi nejskerjej demoralizěrowało. K tśeśemu by se wóni z tym wurubili swójogo nejwažnjejšego srědka za pśiduce źěło. Wšak jo rowno za statnu bźeztšašnosć płaśeła zasada, až wóznamjenijo w aktach nazběrana wěda móc.