W nowemberskem wudaśu Rozglěda derje njenamakajomy žednogo nastawka w dolnoserbskej rěcy, ale weto dajo někotare, źož dolnołužyska tematika jo pótłusnjona. Ceło prědku dejmy wobspomnjeś dalšny nastawk we rědu mjenjowědnych pśinoskow prof. Waltera Wenzela „Serbska rana historija we swětłu mjenjow“. Tenraz źo wó gólne pcołkaŕstwo, kótarež jo něga grało pla Serbow wažnu rolu. Jogo slědy namakaju se we wjelich mjenjach jsow, mjazy drugim we mjenju jsy Barce/Barzig pla Złego Komorowa (< Bart’sk, źož se chowa słowo barś ‚Beute‘, nutśi prozny štom, źož pcołki su měli swójo gnězdo). Pokazki na pcołkaŕstwo namakaju se tejerownosći we familijowych mjenjach kaž Roj(k) ‚Schwarm‘ a Patok(a) ‚Nachbier, Honigbier‘.