Kónje we źinsajšnej rusojskej stepje – wóttudy jo pśed jadnab 5.000 do 4.500 lětami pastyŕski lud ze swójim zbóžom a z kónimi „rozběgnuł“ na wšykne boki. Na swójich wandrowanjach njejsu wóni jano pśišli do slědnych rogow Europy, ale se wusednuli we wjelich stronach Aziskeje, a samo do Indiskeje pśišli. Což archeologi su južo pjerwjej gódali, su genetikarje něnto kradu wopokazali. 
Kaki lud jo roznjasł pó cełej Europje a Aziji rolnikaŕstwo a pastyŕstwo a co ma to cyniś z rozšyrjenim indoeuropskich rěcow? Na to pšašanje jo gano wótegrono dała nowa interdiciplinarna studija pód nawjedowanim Departamenta za ewolucionarnu antropologiju Wienskeje uniwersity. Z njeje se naspjet wuznajo, až indoeuropske rěcy jo roznjasł pastyŕski lud z euroaziskich stepow (Steppen) pśed jadnab 4.500 lětami. Wót togo pišotej mjazy drugim portal Archeologie-online a awstriski informaciski portal DerStandard. Studija jo se wózjawiła we wědomnostnem casopisu Science.
sobota, 20.04.2024
