Ze Serbskego sejma. Serbski sejm njeakceptěrujo to rozkłaźenje nimskego kněžaŕstwa, až ILO-konwencija 169, kótaruž Nimska co ratificěrowaś, njedej płaśeś za serbski lud. Na dopšašanje Casnika we zachadnem tyźenju, co nimske kněžaŕstwo se we tej nastupnosći mysli, jo ga powědaŕ kněžaŕstwa dał k wěsći: „Konwencija dla domorodnych a we rodach (Stämme) žywych ludow z lěta 1989 měri se na staty, na kótarychž teritoriumje, za wětšy źěł ako rezultat kolonizěrowanja, bydli tak pomjenjona indigena ludnosć (...). Narodne mjeńšyny w Nimskej njepłaśe ako domorodne abo we rodowych strukturach žywe ludy we zmysle konwencije“.

Powědaŕ wustawowego wuběrka pśi Serbskem sejmje Hajko Kozel měni k tomu: „Rowno historija kolonizěrowanja [Łužyce] płaśi za serbski lud. Až rowno ten kriterium se nałožyjo ako argument pśeśiwo pśipóznaśu Serbow ako indigeny lud, to my wótpokažomy“. Za jogo suźenim wobstoj how wjelika pótrjebnosć za rozjasnjenje, a Serbski sejm co se dla togo z kněžaŕstwom do rozgrona daś.