Z Barlinja/Berlin. Nimske kněžaŕstwo ma drje wótglědanje ILO-konwenciju k wobzwarnowanju indigenych ludow pódpisaś. Wóno pak měni, až Serby a druge awtochtone mjeńšyny w Nimskej njesłušaju k indigenym ludam, ako su žywe we rodowych strukturach (in Stämmen lebend), daniž njejsu domorodne we zmysle konwencije. To jo nam k wěsći dał powědaŕ nimskego kněžaŕstwa na našo pšašanje.

Z togo se wuznajo, až to póžedanje Serbskego sejma, aby Serby se pśipóznali ako indigeny lud we zmysle konwencije, njebuźo se nejpjerwjej dopołniś. Wótpósłany Serbskego sejma Heiko Kozel ga jo se pjerwjej dla teje wěcy we kanclaŕskem amśe pšašał. To wótegrono, ako kněžaŕstwo jo jim pósłało, jo wón interpretěrował tak, až kněžaŕstwo co z ILO-konwenciju 169 teke serbski lud wopśimjeś. (glěj powěsć na 1. boce)