Ze Žylowa/Sielow. Jadnab tśiźasća luźi jo pśišło pśed tśimi tyźenjami na premjeru Serbskeje Pratyje za lěto 2020 do sportaŕskego domu. Głowny redaktor Pratyje Horst Adam jo se wjaselił, až tudy maju wjele awtorow, wěcej ako w drugich jsach. Dla togo jo to wudaśe bejnje žylojske, a tych žylojskich artikelow a tšojenjow jo było teliko, až njejo było móžno wše teksty pśiwześ.

Kaž jo to na kuždej premjerje nałog, su cłonki redakcije a awtory lazowali pśedewšym take teksty, kótarež maju z „titelneju jsu“ cyniś, a to jo něnto Žylow. Wót historije swójeje familije a jeje dłymokich žylojskich kórjenjow, jo pisał a na premjerje wulicował Gerhard Grěbik (Gräbig). Wopokazane ga jo, až jogo wóścy bydle južo wjele hundert lět we jsy! A taki titel ma jogo nastawk Gräbigojc – južo 400 lět w Žylowje. Awtor wopisujo, kak jo w cerkwinych knigłach a drugich pisnych dokumentach pytał a co jo namakał.