Z Grodka/Spremberg. Lětosa su Grodkojske tśeśi raz pšosyli na serbski nazymski koncert. Wustupiła jo tenraz kupka „Kólesko“ ze slěpjańskimi spiwami, w znatem gósćeńcu „Schweizergarten“. Slědnu njeźelu w septemberje jo někak 45 luźi pśišło, aby se rozwjaselili. Jaden a drugi jo se myslił, až to jo snadna licba, ale glědajucy na tych wjele stupnicow we tom gósćeńcu, na swěźeń na Njepilic dwór a wšake druge „konkurěrujuce“ zarědowanja na tom dnju se njezdajo ta licba małka.

Do muziki su luźe se zesłoźeś dali mlince a kafej. Petra Kowarkowa, wjednica Domowinskeje kupki, jo šła glědat wšuźi a jo luźe wuwitała. Pśišli su luźe z Grodka a z wokolnosći, kaž tež ze Slěpego ako Helmut Hantšo.