Z Chóśebuza/Cottbus. Zagronita za nastupnosći Serbow w Bramborskej dr. Ulrike Gutheilowa jo wałtoru tyźeń pśišła do Serbskego domu na swójo slědne zmakanje ze zastupnikami serbskich institucijow (glej artikel zwjercha).

To rozgrono jo se platło wokoło rewitalizacije serbskeje rěcy. Gutheilowa jo prezentěrowała rezultaty diskusije wó pśichod rěcy Jo! za tebje. Dopomnjejmy se: Luźe su wordowali pšosone, aby swóje myslenja zjawili, co sebje wót serbskeje rěcy a jeje pśichoda mysle a co dej se cyniś. To dej byś zakład za wuźěłanje masterplana k rewitalizaciji serbskeje rěcy.

54 wótegronow jo na to napominanje wordowało do ministaŕstwa pósłanych, 19 wót wuknikow gymnaziuma. Z nich se južo na prědne póglědnjenje wuznajo, až buźo trjebne diferencěrowane planowanje za wšake cilowe kupki – jo Gutheilowa měniła. Wót togo buźomy w Casniku hyšći ekstra pisaś.