Z Terpjego/Terpe. Tudska historiska „pšuska hupa wognjoweje wobory“, kótaraž wobsejźi originalnu rucnu sykawu z lěta 1912, jo cora wuleśeła do New Yorka na tu wuwołanu General Steubenowu paradu, ako buźo sobotu. General Steuben (1730–1794) jo we USA wjelgin cesćony: Wón jo ako pšuski oficěr pśe­twarił a zmócnił Kontinentalnu armeju za cas Amerikanskeje wójny wó njewótwisnosć (Unabhängigkeitskrieg). Jomu k cesći, pśed 80 lětami, jo militarna parada se prědny raz organizěrowała, a wót togo casa kužde lěto mógu se na njej wobźěliś historiske wójaŕske kupki, nosarje uniformow a muzikowe kapele.

„Pšuske woborniki“ z Terpjego njejsu swóju sykawu sobu wezeli, to se wě. Wóni budu we swójich uniformach se na paraźe wobźěliś. Gaž wušy šołta New Yorka Bill de Blasio buźo wobźělniki witaś, budu teke Terpjańske krotke póstrowne słowa groniś.

Terpjańske wobźěliju se teke na swěźeńskej namšy a na swěźeńskej gósćinje. Na tom dnju dajo teke wjele piwowych swěźenjow a Oompah-swěźeń, źož se prezentěrujo nimska kultura (Steuben jo nejwěcej znaty a cesćony Nimc we historiji USA).