We wjažy Měsćańskego muzeja w Chóśebuzu (Dwórnišćowa droga 22) buźo źinsa (stwórtk, 12. september), zeger 18:00 Serbske blido na temu: „Slědna šansa ‒ tak buźomy dolnoserbsku rěc wótžywiś“. Gósća buźotej Maksimilian Hasacki a Šarlota Kušcyc. Wobej stej se wobźěliłej lětosa w juniju w Kanaźe w staśe Victoria na mjazynarodnej konferency „Dajśo rěcam žywe byś!“ Wónej stej ako zastupnika Serbow słušałej k něźi 1.000 wobźělnikam z cełego swěta. We workshopach stej se zaběrałej a rozestajałej z wšakimi modelami k zdźaržanju rěcy małych ludow.

Maksimilian Hasacki jo student zeleneje chemije/green chemistry w Londonje. Wón słuša do prědnego lětnika Witaj-źiśi w Chóśebuz-Žylowje, jo absolwěrował Dolnoserbski gymnazium, powěda serbski a woplěwa aktiwnje wejsańske nałogi. Wón jo cłonk Zwězkowego pśedsedaŕstwa Domowiny.