Diese Seite drucken

„Bubaki“ su swěśili ze serbskimi familijami a su pomogali faraŕce

Awtor: Gregor Wieczorek stwórtk, 12. september 2019
Młode Bubaki źěłaju: Šramojc Maja, Elias Bisse a Johann Rabe rozbijaju wobchytanje sćěny we wósadnej śpě na farje. Fota: G. W.

Z Dešna/Dissen. Młoźinska redakcija rbb-magacina Bubak jo srjodu tyźeń swěśiła we farskem gumnje. Góźba k tomu jo nastała pśez to, až Elias Bisse ze Žylowa – jaden wót tych młodych wugótowarjow Bubaka a lětosny absolwent Dolnoserbskego gymnaziuma – jo Bubakoju bóžemje dał.

Wón buźo wót nazymskego semestera studěrowaś fach „Technika zgótowańskich procesow na pólu natury a wobswěta“ w Ambergu w Bayerskej a njebuźo móc wěcej za serbske radijo źěłaś.

Diana Šejcowa z Hochoze a Gregor Kliem z města, sobuźěłaśerja serbskeje redakcije rbb, stej pśi tej góźbje ned pśepšosyłej teke serbskorěcne familije do Dešna (wónej samej ga se za serbsku rěc we familiji angažěrujotej). Mimo Eliasa su dalšne styrjo „Bubaki“ pśišli: Šramojc Maja z Gołbina, Johann Rabe a Dödingojc Thomas a Stefan ze Žylowa.

Kuždy jo dejał pśinjasć něco k jěźi sobu. Naslědku su źiśi, młoźina, starjejše a faraŕka Katharina Köhlerowa pśi bogaśe nakłaźonem bliźe gromaźe grilowali, wjacerjali a se na serbske rozgranjali.

artikel pógódnośiś
(0 )
Pšosym zalogujśo se, cośo-li komentar dodaś