Z Lěšćow/Hornow. Ten góspodaŕ a góspoza burskego dwóra „Erlengrund“, Budekojc Andrea a Rüdiger, stej kazałej njeźelu pśed dwěma tyźenjoma na dwórowy swěźeń. Dla tog, až jich rolnikaŕske produkty su znate a jich swěźenje maju dobre mě, jo pśišło zasej wjele woglědari, za wětšy źěł z města. Tam ga Budekojc su z mobilneju pśedawaŕnju kuždy tyźeń na marku.

Ten źeń su luźe mógli wše rolnikaŕske produkty na Budekojc dwórje kupiś. Sad a zelenina a wšake sorty kulkow su namakali wjele kupowarjow. Wšykno ze swójeje role! A teke ta jěza a měso – wšo z jich samskich groźow. Pjacona swinja z kisałymi kulkami, pjacone jěšnice, mlince a mazańc z pjaca jich źowki Liane.

Na dwórje jo było śěžko, chłodkojte město pśi blidach namakaś. Južo połdnjo jo se rejowało k dujaŕskej muzice. Pśi Annamarie-polce jo ten góspodaŕ sam naprědk stupił. Grali su gercy z Wjelceje a kapela Original Lausitzer Blasmusikanten.

Mark bywa kužde lěto wětšy. Pśedawarje su pśišli samo ze slěpjańskich stronow a z Błotow. Z Budekojc palaŕnje jo sajźiło jajowy likěr, sliwowicu a paleńc wót sadu.