Z Chóśebuza/Cottbus. Julija Šmidtojc, ceptaŕka za serbšćinu, jo se dnja 13. julija brała swójogo muskego. „To jo rědna wěc, ale kak comej cyniś z mjenim?“ jo se Julija pšašała (wóna póchada z Mósta). Rozmjej: Tej pśichodnej manźelskej stej kśěłej měś jadnake mě, a Julija jo kśěła mě swójogo cłowjeka. Ale: Julija jo južo pśecej kśěła rědne serbske mě měś, jo Casnikoju wulicowała. Wót pśikłada Měta Nowaka jo wěźeła, až jo móžno, swójo mě teke oficialnje zeserbšćiś daś. Do swajźby jo se pśemyslowała, kak jaden mógał zeserbšćiś to mě „Biering“ (tak se cłowjekoju groni, wón jo z Turnowa). Wóna jo šła pšašat na amśe, tam su jej gronili, až ma dwě móžnosći: Wóna móžo pśestajiś to mě a pśez to dostaś serbske familijowe mě. Druga móžnosć jo, až móžo to mě tak pśepisaś, až buźo we serbskej ortografiji. Tak jo nejžpjerwjej tichtowała: Co dej byś pśestajenje wót mjenja „Biering“? Wóna jo glědała w interneśe a pytała a wužywała wšykne móžnosći, ak internetowy portal www.dolnoserbski.de póbitujo. Sama jo se mysliła, až mě Biering móžo se rozměś ako „bur“.