Z Picnja/Hochoze–Peitz/Drachhausen. We Hochozy maju źiśownju „Tyca“, pódla jo Witaj-kupka. Źiśownja jo we jsy wót lěta 1957. Na zachopjeńku jo w domje hyšći było bydlenje za kuchaŕku źiśownje. Wjažu teje źiśownje su pśed 20 lětami (w ramiku wobnowjenja jsy) saněrowali. W běgu casa su byli dalšne modernizěrowanja a twaŕske źěła, rucnikarje ze jsy a starjejše su wjelgin pomagali. Mjaztym pótrjeba wjaža dalšnu pśetwaŕ a saněrowanja, na pśikład kśě pšawe schódy (Treppenhaus) město jadnoreje stupnice, śpy za wótkubłaŕki a śpu za nejžmjeńše źiśi. Aby to wšo zwónoźeli, su we Hochozy wót lěta 2017 źěłali na koncepciji saněrowanja a su pisali pšosby wó financielnu pódpěru. Srjejź 2017 ga jo gmejna groniła, až saněrowanje dej byś.