Prědku w pśeśěgu ten z karu, gerce a za nimi źowća a žeńske a pón te młode a starše rejtarje. 
Z Turjeja/Tauer. Južo 40. raz su Turjańske zgromadnje łapanje kokota swěśili a rědny źeń dožywili. Wobydlarje jsy su za to wjelgin pilne byli. Móžo byś, až někotare wót was su we slědnem casu pśez Turjej dundali, jěli abo kólasowali, a su wiźeli, až su zagrodki pśed domami bejnje kreatiwnje wupyšnjone. Ja cu to krotko rozkłasć: Turjańske su wuběźowanje pśewjadli wó nejrědnjej wupyšnjonu zagrodku. Wjele luźi jo se procowało a su rědne ideje měli. Jadna familija jo na pśikład fortu natwariła a jo kónje z drjewa napórała.
Ale to njejo to jadnučke, což su pśigótowali. Srjodu a stwórtk su se luźe zmakali a su fortu, kronu a wěnce wili. To jo było wjele źěła, ale z pilnymi pomocnikami su to zwónoźeli.
