Pśi góźbje jubilejnego tyźenja „600 lět Sprjejce/Spreewitz“ kóńc junija (Casnik jo pisał) jo tradiciske towaristwo „Glück auf Carna Plumpa“ kazało do kjarcmy Max & Moritz na pśednosk k temje „Gmejna Sprjejce a industrializacija Łužyce“.

72% wobydlarjow Sprjejc jo něga źěłało we gazowem kombinaśe, 83 źěłaśeri. Na to jo pokazał prědkstojaŕ jsy Werner Reeb pśi pówitanju. Pśednosk jo źaržał dr. Grünert Seifert, pśedsedaŕ towaristwa „Glück auf“.

Industrializacija jo se tudy zachopiła kóńc 19. stolěśa, a jo była wót wšogo zachopjeńka wótwisna wót brunice. Brunica njejo wobraźiła luźam jano źěło, ale teke spórała śopłotu a swětło do bydlenjow. Wuglowa jama jo se wótworiła 1906 („Hoffnung“, pótom „Brigitta“ a naslědku „Spreetal“). 1917 jo prědna elektrica wujšła z elektraŕnje w Dubrawje (Trattendorf). Burja z wokolnych jsow su se pśistajili ako źěłaśerje w jamje, briketowni abo elektraŕni.