Z Chrósćic/Chrostwiz w Górnej Łužycy. Te wšake ansamble a rejowaŕske kupki, kótarež su wustupili na folklornem festiwalu Łužyca, maju wjelgin njejadnake wobstojnosći. Tym jadnym dostanjo se wjelgin dobra pódpěra wót swójogo statu, tym drugim zewšym žedna, a wóni muse wšykno we cesnem amśe gótowaś. To jo se wu­znało z kulturnego foruma k tej temje, kótarež jo Domowina pśewjadła w Chrósćicach pśi góźbje festiwala – pišu Serbske Nowiny.

K tym, ako muse źěłaś mimo pódpěry, słuša ansambel BAFOPAZ z Boliwiskeje. Jich wjednica Ana Vivan Aiscuarinaga Gil jo pódšmarnuła, až šym wažnjejšy jo cesnoamtski a wósobinski angažement cłonkow. To nastupa gótowanje kostimow a drastwy, kaž teke dokumentěrowanje a wuchowanje tradicionelnych kulturnych formow. Wóni angažeruju se wušej togo na pólu kubłanja a wuce źiśi rejowaś, wóni wobstaraju 500 wuknikow. „Kněžaŕstwo jo nam lětosa prědny raz pjenjeze pśizwóliło, a jano dla togo móžomy něnto turu pśez Europu gótowaś“, jo wóna groniła. Aby to se stało, su se pak musali na statnem wuběźowanju wobźěliś a dobyś.