Z Pódstupima/Potsdam. Bramborska a sakska Serbska rada stej pśed tśimi tyźenjami zgromadnje wobradowałej. Tema wobradowanja jo było pśeměnjenje góspodaŕskich strukturow w Łužycy („strukturna změna“) a jogo wucynki na serbsku rěc a kulturu. Za powěsću Serbskich Nowinow su wóni pśepošyli dr. Klausa Freytaga, pśi bramborskem kněžaŕstwje zagronitego za strukturnu změnu w Łužycy. Wobej raźe stej byłej wobjadnej, až ze serbskimi aspektami togo pśeměnjenja deje wjelgin sensibelnje wobchadaś. Dla togo dej to byś tema we wuběrku bramborskego parlamenta za Europsku uniju a regiony, źož serbska problematika dotychměst njejo žednu rolu grała.

Něntejšna legislaturna perioda chyla se ku kóńcu, a cłonki wobeju serbskeju radowu su zjadnje měnili, až teke nowej serbskej raźe dejtej we pśichoźe take zgromadne wobradowanja dalej wjasć. Rownož w Sakskej a Bramborskej dajo njejadnake kazni, ga weto jo taka wuměna (Aus­tausch) wažna a wužytna.