We Wětošowje su dobrowolne luźe 21. junija ambroziju wuryli. Tam maju južo pěś lět dłujko kužde lěto wósebnu akciju za pódušenje ambrozije. A ten wuspěch jo, až na terenje wokoło tamnego kupanišća (Sommerbad) a na drugich flakach města wjele rostlinkow njejsu lětosa namakali. To jo było pśed pór lětami hynac. Foto: I. Neumannojc 
Zwětšego smy z awtom ducy a njeglědamy na to, co rosćo na kšomach drogi. A malsnje dej teke hyś. Druge ga budu se staraś.
Ale młogi jo teke z kólasom abo z psom ducy a glěda, co na kšomje drogi rosćo. Kuždy jo pótrjefjony wót negatiwnego wliwa ambrozije na našu strowotu. Jaden wěcej a ten drugi mjenjej. Dlatog dejmy na to źiwaś, až móžomy tu nam njelubu rostlinku pódušyś (eindämmen).
Nejlažćejša wašnja k tomu pśipomagaś jo pśizjawjenje pla zagronitych. To jo nejpjerwjej ten koordinator za tamanje ambrozije w kraju Bramborska Matthias Hoffmann. Wón trjeba pśeglěd, źož ambrozija rosćo. Mjazy drugim jo to wažny za planowanje napšawow za pódušenje teje rostliny. Lichotna uniwersita w Barlinju ma atlas, źož jo móžno wšykne te flaki, źož ambrozija z kopicami rosćo, zapisaś. Tam maju tuchylu hyšći mało zapiskow. Koordinator Hoffmann ma swójo źěło w krajnem amśe za nakrajne wuwiśe a rolnikaŕstwo: 033702-211-3658 abo . Wón dawa buram, wobsejźarjam gruntow a wšym drugim do rady.
