Z Pódstupima/Potsdam. Te 400.000 euro za serbske źiśownje, kótarež bramborski parlament jo łoni w decemberje pśizwólił, njamógu se doněnta wupłaśiś, dokulaž ministaŕstwo za kubłanje njejo wuźěłało žedne regule a žeden koncept za spěchowanje źiśownjow. To su za powěsću serbskego radija rbb zgónili cłonki Serbskeje rady wałtoru tyźeń na zgromadnem wobradowanju sakskeje a bramborskeje Serbskeje rady we wjažy krajnego parlamenta. Grozy něnto tšach, až te pjenjeze pójdu kamsy, nanejmjenjej lětosa.

Angela Šurmanowa wót Serbskeje rady jo w radiju powěźeła, až do kóńca lěta jo małko casa wušej, a žedna serbska instanca njepśemóžo něnto nachwatki take regule za wudaśe tych pjenjez pśigótowaś. „To jo tako statny nadawk“, jo wóna pśi tom zaspomnjeła. A bóžko, daniž zastupniki kubłańskego ministaŕstwa daniž Rěcnego centruma Witaj, njejsu na tom wobradowanju pódla byli – jo Šurmanowa woblutowała.