Źinsa (stwórtk, 20. junij) zeger 16.00 buźo w klubowni Dolnoserbskego internata prezentacija serbskeje studije we wobłuku projekta SMiLE (Sustaining Minoritized Languages in Europe). Jeje titel zni: Serbskej rěcy, wopyty rewitalizacije we wšakima politiskima systemoma.

We studiji prezentěruju se nejwažnjejše dopóznaśa, ako maju cyniś ze něgajšnymi a aktualnymi pilnowanjami wó wótžywjenje wobeju serbskeju rěcowu. Pśednosk dajo wobźělnikam góźbu, aby se rozgranjali a gronili, co se mysle wót situacije dolnoserbskeje a górnoserbskeje rěcy, wót aktualnych aktiwitach Sakskeje a Bramborskeje a teke Serbow samych. How budu pśiglědarje móc diskutěrowaś, co jo trjeba, aby wobej rěcy se wobchowałej a dalej wuwijałej.

Program wopśimjejo głownu prezentaciju projektoweju wjednicowu dr. Cordule Ratajczakoweje a prof. dr. Nicole Dołowy-Rybińskeje wórěcnych rumach a rěcnej politice w Górnej a Dolnej Łužycy. Jima se pśizamknjo Gregor Kliem, ako buźo we swójom pśednosku glědaś na rěcnu praksu w Dolnej Łužycy. Góźba k diskusiji buźo dana na kóńcu.