Chtož jo pódla był, ako redakcija dolnoserbskego telewizijnego magacina Łužyca 6. junija jo kazała do měsćańskego domu w Chóśebuzu na zjawnu diskusiju z tšochu prowokantneju temu „Wumrějo serbska rěc?“, jo tam słyšał wjele, což póstarcyjo do pśemyslowanja.

Wšake, což jo južo znate, pak teke to a druge, což pokažo, až smy póznali, kak mócnje wobgrozona jo dolnoserbska rěc, a až to, což jo se dotychměst cyniło za jeje zdźaržanje, za jeje rewitalizaciju, dawno njedosega. To njejsu jano jasnje pokazali njespokojece rezultaty ewaluacije Witaj-wucby w Dolnej Łužycy, ale teke na drugich pólach bóžko ze serbskeju rěcu pšawje doprědka njejźo.

*