Ze Złego Komorowa a Chóśebuza/Senftenberg|Cottbus. We slědnem Casniku smy pisali, až južo pór tyźenjow, wót kóńca apryla, njepušća se wěcej wóda do Liškojskego jazora (Cottbuser Ostsee). Gdy pójźo to z tym połnjenim dalej? Za tym smy pšašali Doris Mischkowu. Wóna jo referentka pla Łužyskeje centrale za połnjenje wuglowych jamow z wódu (LMBV Flutungszentrale). Wóna jo nam rozkładła, až tuchylu njejo dosć wódy w Sprjewi. Deficit gruntoweje wódy njejo se hyšći wurownał, a se njepada dosć. Wóda w Sprjewi jo pśi měridle (pegelu) w Lubušy (Leibsch) w Dołojcnych Błotach mócnje spadnuła.