Ze Smogorjowa/Schmogrow. Tudske tradiciske towaristwo jo swětki swěśiło 25lětny jubilej. Jomu pśisłuša źinsa 39 cłonkow, a wóni su we casu swójogo wobstaśa 415 raz na jawišću wustupili, mjazy drugim w Egyptojskej, Awstriskej a Pólskej. K jich repertoire słušaju tradicionelne reje, ak stare nany a mamy tych załožarjow su we swójom młodem casu rejowali: Annemarie-polka, rheinländaŕ, kśicna polka abo luksmburska reja. Žeńske woblekaju serbsku drastwu a stajaju sebje zasej lapu na głowu.
Na swój swěźeń su cłonki towaristwa kazali wšyknym, nic jano pśijaśelam. Žeden płaśonk njejsu pominali. Wejsanarje a sponsory su jim pomogali taki swěźeń wugótowaś. Sajźiło jo fryšny tykańc z wejsnego pjaca (jen jo napjakła Mariana Worakowa z Dešna, ak jo z towaristwom wusko zwězana), grilowane měso, mlińce a kafej. Stara rolnikaŕska technika jo se rozpokazowała, a za źiśi jo dało teke graśa.