Z Chóśebuza/Cottbus. Wědomnostne towaristwo Maśica Serbska jo měło pětk w Serbskem domje głownu zgromaźinu. Pśedsedaŕ dr. Pětš Šurman jo wulicował wót aktiwitow towaristwa. Zgromaźone su słyšali referat Reneja Šustera wót Zeleneje Ligi k aktualnemu stawoju (how: Zustand) diskusijow wokoło wótstupjenja wót brunice. Referent jo z teju tematiku derje wopóznaty: Wón jo pśiźěłał cłonkoju wugloweje komisije Hannelore Wodtkowej z Wjelceje, kótaraž tam zastupujo wobydlarjow, ako su wót jamy pótrjefjone.
Šurman jo zespominał statki a aktiwity towaristwa w zachadnem lěśe. Łoni w aprylu jo pśedsedaŕ pśigótował we kooperaciji ze Serbskim muzejom wustajeńcu Maśica Serbska mjazy tradiciju a modernu. Góźba k njej jo był jubilej 25 lět nowozałoženja Maśice w Dolnej Łužycy.
K dalšnym tšojenjam jo słušało kolokwium k cesći Bogumiła Šwjele (pśi góźbje jogo 70. smjertnego dnja), we zgromadnem źěle z městom, Serbskim institutom a rěcneju šulu. Tśi wót pěśich referatow su źaržali cłonki Maśice.