Cerkwicka w Gołbinje jo była pór mjasecow dłujko zacynjona. Su ju renowěrowali. Šćěny, koru, hołtaŕ a prjatkarnju su wubarwili we nowych barwach. Pśidatnje su koru, hołtaŕ a prjatkarnju renowěrowali. To groni, až su tam, źož te cerwiki su to drjewo pśewjele pśetocyli, nowe drjewo napórali. Wjele to wšykno kóštowało jo, to njejo kśěł wósadny faraŕ Natho Casnikoju groniś, ale „droge jo było“. Zapłaśiła jo wšykno Gołkojska wósada. Prědna namša pó renowěrowanju 21. februara jo była swěźeńska. Wjele žeńskich jo pśišło w serbskej namšarskej drastwje, a Šramojc Ronja jo cytała ewangelium w serbskej rěcy.