Z Janšojc/Jänschwalde. 31. měrca jo była w Janšojcach rědna dwójorěcna namša. Bźomy za tyźeń w Casniku wó tom rozpšawiś.

Nejpjerwjej dej byś to grono wót woglěda manźelskeje z Teksasa. Sandra a Raymond Matthijetz (Matijec) z La Grange pla Austina stej ga pśipódla byłej w Janšojcach. La Grange lažy we tom wobceŕku, źož su něgajšne wudrogowarje z Łužyce se wusednuli ako nowe Amerikanarje.

Dwójorěcna namša w Janšojcach ze spiwanim serbskego projektowego chora a namšaŕkami w serbskej drastwje jo se Matijec manźelskima wjelgin derje spódobała. Stej byłej zapalonej wót teje namše a gaž budu hyšći raz w Łužycy, stej groniłej, cotej zasej take něco dožywiś.

Manźelskej znajotej Łužycu južo wót lěta 1993. Sandra źěła we tom muzeumje w měsće Serbin, źož se dopomnjeju na serbske kórjenje. Tam maju wjele knigłow, źož te luźe slěźe za swójimi swójźbnymi.

Matijec matej kontakt z Krawcojc luźimi w cełej Łužycy, až do Barlinja, dokulaž Krawcojc su jeju prědowniki. We Weigersdorfje, wótźož póchadatej, stej samo złośanu swajźbu swěśiłej.