Sobotu, 16.03.2019, zeger 13:30 – 14:00, w telewiziji rbb

„My – Słowjany w Nimskej“ – dokumentarna serija (3. źěl: Jacza z Köpenika a bitwa wó Bramborsku)

W źinsajšnem Barlinju, Bramborskej a Sakskej su byli Słowjany pśez stolěśa we wětšynje, jich wjerchy su wobkněžyli kraj. Naša trilogija pśedstajijo, kak su nimske dobywarje w běgu stolěśow na se spórali kontrolu za toś ten kraj. Z rozpśestrěśim mócnaŕstwa/rajcha Frankow do pódzajtša jo měrnemu pśisedlenjeju slědował cas kšawnych bitwow, zamordowanja wjerchow a wósromóśenja religioznych městnosćow. Militariski su nimske agresory dobyli z pśewześim słowjańskego głownego groda w źinsajšnem Bramborgu nad Habolu. Kšawne naroźenje marki w juniju lěta 1157.

Dokóńcny źěl trilogije slěźi za pósołstwom ranych słowjańskich stawiznow na młodych Serbow źinsa. Pśi tom se narěznjo teke pšašanje, lěc móžotej słowjańska abo nimska identita w modernem towaristwje byś do pśichoda pokazujucej. Źinsa namakajo se jano hyšći mało slědow słowjańskeje zachadnosći w serbskem sedleńskem rumje.