Diese Seite drucken

Lětosa su wustali wu Smolcyc

Awtor: Georg Zielonkowski stwórtk, 14. měrc 2019
Jubilejny zapust w Zaspach: Wjasoły ruš na Smolcyc dwórje. Foto: G. Z.

Ze Zaspow/Saspow. Kužde lěto gótuju zapustarje pśi pśeśěgu na poł droze dlejšu pawzu – to ga jo trjeba, pśeto Zaspy ga su dosć wjelika wjas. Pśecej jo jim Hilde Müschnerowa na dwór kazała. Lětosa pak su wustali na jsy, naprěki něgajšneje kjarcmy. „How jo bydliła Marlies Smolcyna (Schmolka), ak jo wjele lět se starała wó serbsku drastwu. Łoni jo wóna wumrěła, a my smy na łońskem zapusće ju wucesćili ze śicheju minutu. Ale to žywjenje bula se dalej, a dla tog su Smolcyc ako źěk za to łońske wucesćenje zapustarjam lětosa na swój dwór kazali. How sajźijo tykańc a kafej! Muzika grajo a my rejujomy“, jo nam wulicowała Hilde Müschnerowa, dla swójich rědnych idejow we jsy ako „źiwa Hilda“ pomjenjona. K jeje młodšym idejam słuša „zaspicki mark starych wěcow“, ako wót lěta 2015 se kužde lěto organizěrujo.

Na lětosnem, 175. zapusće jo se wobźěliło 74 pórow. Wósym žeńskich jo měło tu naglědnu lapu na głowje. Dwóje gercy su se starali wó wjasołu atmosferu. Prědku su šli 12 źiśi, źowćka we serbskej drastwje.

artikel pógódnośiś
(0 )
Pšosym zalogujśo se, cośo-li komentar dodaś