Z Dešna/Dissen. Gaž se něźi wó zapustach pišo abo wulicujo, pón stoje pśi tom za wětšy źěl te wufajnowane zapustojske póry ceło prědku. To jo pšawje tak, wóni su se to zasłužyli. Pak teke młoge druge maju wjeliku zasłužbu, až jo ten pśeśěg k zapustoju za wšych wjelike a rědne dožywjenje. K nim słušaju te žeńske, ako źowća tak rědnje a akuratnje woblekaju. A rowno na to jo rbb glědał, ako běchu se njeźelu, 24. februara, ze swójeju kameru a z mikrofonom wudali na młoźinski zapust w Dešnje. To se wě, až su zapópadnuli pśi nejrědnjejšem nalětnem wjedrje wjasoły zapustojski ruš młodych luźi, ale su byli južo dopołdnja na woglěźe pla Marjany Worakoweje, ak jo woblekała marušu, a to wšo a ten zapust su byli pón wjacor wiźeś w programje „Brandenburg aktuell“. To jo była dobra ideja redaktora Michaela Noacka a tych filmarjow.