Z Rownego/Rohne. Dnja 22. februara su se zmakali cłonki towaristwa „Njepilic dwór“ na swóju „hoklapnicu“, ako jo teke lětosna głowna zgromaźina towaristwa. Wóni su bilancěrowali, co se pla nich w bogatem lěśe 2018 stało jo. Wušej togo su wobradowali, kake cile a prědkweześa maju 2019.

Žyce sebje kulturnego managera

Towaristwa žycy sebje kulturnego managera. Togo kśě pśistajiś na swójom dwórje, a su južo póžedanja za spěchowanje takego źěłowego města stajili pla Załožby za serbski lud. Tuchylu cakaju na rozsud teje załožby. Notny jo taki manager, aby pśewóźował a koordiněrował projekty ze źiśownjami, šulami a drugimi institucijami. Wón dej se teke staraś wó gósći a turisty na dwórje a wšake nadawki měś.