Z Njabožkojc a Długow/Nauendorf und Fleißdorf. Teke tudy su sobotu zapustowali. Pśeśěg z 33 pórami stej organizěrowałej Torsten Mroz (Mroß) a Torsten Kulik. Zachopili su w Njabožkojcach pśi bóśonowem gnězdźe, pśed kjarcmu. Prědnu staciju su měli pla Wernera Schultchena, ako buźo lětosa 90 lět. Laura-Marie Jurkowa jo jomu pśepowdała strusk, we tom ako te druge su we płatowej wjažce se chopili wułapowaś wó skibki, pampugi a jěšnicki. Gercy Fichtemusikanten z Popojc su pór štuckow zejgrali, a teke ten pócesćony jo rejował sobu. „Ja som telik razow sobu gótował na zapusće, ale bóžko, to njejźo wěcej“, jo Werner Schultchen nam gronił, pśiglědajucy tym rejowarjam na swójom dwórje, źož cełe žywjenje bydli. Zapustarje su woglědali teke sponsoram, a su wustali mjazy drugim wu Jurkojc, Kulic a Lewerencojc, źož su jim dali piśe z jerjebiny!

Pótom su se wupórali do Długow. How su woglědali Anni Neumannowej (91), Lothar Gärtneroju (83) a do Kwětkojc pensiona.