Z Budyšyna/Bautzen. Zwězkowe pśedsedarstwo Domowiny jo na swójom wobradowanju 15. februara w Budyšynje głownje se zaběrał z pśigótowanim głowneje zgromźiny. Su mjazy drugim wobzamknuli nacerjenje źěłowych směrnicow 2019 - 2021, ako deje se skóńcnje wobzamknuś na głownej zgromaźinje 30. měrca w Chrósćicach.
Župa Dolna Łužyca póžeda sebje klawzuru k wugódnośenju rezultatow Witaj-ewaluacije. Na kubłańsku konferencu cakaju Dolnoserby južo dłujko. Zwězkowe pśedsedarstwo jo něnto dało Witaj- centrumoju ten nadawk taku klawzuru pśewjasć, a to hyšći w aprylu.
Župa Jan Arnošt Smoler Budyšin/Bautzen co měś teke ewaluaciju serbskeje wucby analognje k našej Witaj-ewaluaciji. Zaměr dej byś nawuknjenje serbskeje rěcy na wusokem niwowje za kužde góle. Zwězkowe pśedsedarstwo jo wó tom powědało.