Gaž změjo Domowinska župa Dolna Łužyca ze swójimi pśisamem 2400 cłonkami w 40 kupkach a 25 towaristwach ten tyźeń pětk, 1. februara, w Bórkowach w tamnem gósćeńcu „Deutsches Haus“ swóju 28. głownu zgromaźinu, pón buźo na njej wósebnje to grono wó serbskem šulstwje w Dolnej Łužycy. Głowny dypk jo pśi tom ewaluacija Witaj-wucby we wšakich dolnołužyskich šulach, pśi kótarychž su zwěsćili tež wjele njedostatkow a njerědnych rezultatow.

Na pósejźenju župnego pśedsedarstwa slědny tyźeń wałtoru w Serbskem domje, na kótaremž su pśigótowali głownu zgromaźinu, su rozpowědali, kak kśě toś tu wjelgin wažnu tematiku na głownej zgromaźinje wobjadnaś. Delegatam a gósćam kśě naraźiś, pśewjasć lětosa wětšu klawsuru k situaciji na pólu serbskego šulstwa. Do togo by se mógało pśewjasć wopšašowanje głownje pla ceptarjow a starjejšych, w šulach, pla Domowinskich cłonkow a w serbskich institucijach, co wóni mysle wó serbskej wucbje, co maju za dobre a co by se dejało na kuždy pad k lěpšemu pśeměniś. Toś te wótegrona „z luda“ deje pón byś sobu zakład za taku klawsuru, rowno tak ako diskusija w medijach.