Gronko lěta 2019:

Pytaj měr a žeń za nim!

(Psalm 34, 15)

Gronko za lěto 2019 jo wjelgin aktualne, mamy ga na swěśe tuchylu wjele wójnow a teke pla nas grozy nowa „Zymna wójna“, samo z grozenim atomoweje wójny. Nic jano taka wašnja njeměra grozy, ale tež njeměr mjazy luźimi pśiběra a nowa politiska partaja njaso njeměr samo do Zwězkowego sejma. Chtož ma facebook abo druge tak pomjenjone socialne medije, móžo tam grozne a žadliwe formy njeměra mjazy luźimi lazowaś ako šćuwanja.

Nam kśesćijanam dajo se pótakem wjelgin śěžki nadawk. Zajmne jo, až jawi se w bibliskem gronje samem wěsta napśeśiwnosć: Měr pytaś na jadnom boce, pótakem něco měrne a pokojne, a na drugem boce „za měrom gnaś“. Pótakem něco wjelgin aktiwne, pópšawem njeměrne. Ja wiźim we tom napominanju, až njejźo how jano wó mój indiwidualny nutśikowny měr, ale to jo napšawdu napominanje, aktiwnje něco za měr cyniś.

To grono stoj w 34. psalmje a jo zajmnje póglědnuś, co tam hyšći stoj. Móžomy tam spó-znaś, až źo teke wó nutśikowny, jo, psychiski měr: „Ten Kněz jo blisko pśi tych, kenž złamaneje wutšoby su, a pomoga tym, kenž zbitego ducha maju“ (19).