Z Hochoze/Drachhausen. Towaristwo serbskich błośańskich rybakarjow Bórkowy a wokolina jo wótźaržało pśedslědnu sobotu w Złotem plonje swóju głownu lětnu zgromaźinu (Casnik jo pisał). Źinsa comy pśidaś dalšne powěsći wót teje zgromaźiny.

Statistika: Teliko rybow su pušćili do rěki

Towaristwo rybakarjow jo łoni sajźiło do rěki 4.157 kg rybow. To su pó rědu: 1.895 kg šćipjełow, 830 kg karpow, 635 kg linow (Schleien), 455 kg candarjow, 270 kg wugorjow (Aale) a 72 kg płośicow. Za to su zapłaśili pśisamem 22.000 euro. Na rozdźěl k pjerwjejšnym lětam njejsu łoni žednych „běłych rybow“ sajźili, pśeto su wuznali, až to nic njepśinjaso. Licba wułojtych rybow ga njejo stupiła (Casnik jo pisał pśed tyźenjom). Stakim su se pśichylili raźe fachnikow, až njedeje teliko sajźonka kupowaś, ale lubjej pjenjeze wudaś za pólěpšenje ekologiskeje kwality tšugow a rěkow.

A to jo wiźeś we statistice: hyšći pśed dwěma lětoma, 2016, su sajźili do rěki 6.974 kg rybow!

Chto móžo rybakarjow pśi łojśu pśewóźowaś?