Z Rownego/Rohne. Sobotu su na Njepilic dwórje zasej šlachtowali. Swěźeń jo se derje raźił: Nicht njejo musał głodny abo z proznymi gjarncami domoj hyś.

Njepiline towaristwo jo pjerwjej ceły tyźeń gromaźe z pomocnikami z wokolnych jsow se na ten źeń pilnje pśigótowało. Pśeto take domacne šlachtowanje jo rucne źěło, a wóno njamóžo se pśirownaś k industrielnej produkciji měsa. Wóno jo stajone kužde lěto pód motto „Kak to jo było“, a wóno jo we cełej wokolnosći znate a luźe se wó te delikatese pšawje wułapuju.

Jadna wěc jo pak źinsa hynac ako we casu Hanza Njepile. Swinju we groźi zarězaś a ju pótom we kóryśe wence pariś, to jo źinsajšny źeń dla hygieny zakazane. Towaristwo jo dla togo južo pśed lětami namakało flejšarja, ako jim zarězanu swinju tunjo librujo. A wóni su sebje techniku z njezarzatego stala (rostfrei, Edelstahl) za gótowanje měsa wobstarali.